Þorsteinn Már Baldvinsson , Hjalti Bogason og Jón Kjartan Jónsson klippa á borðann

Jón Kjartan Jónsson framkvæmdastjóri Íslandsbleikju býður gesti velkomna

Íslandsbleikja, stærsti bleikjuframleiðandi í heimi, opnaði síðast liðinn föstudag nýja stækkun við eldisstöð sína á Stað í Grindavík. Með þessari nýju eldiseiningu er áætlað að auka heildarframleiðslu á bleikju um 25% á ári þegar öll kerin verða komin í fulla framleiðslu. Um er að ræða átta ný eldisker sem eru sextán þúsund rúmmetrar að stærð og bætast við núverandi 28 þúsund rúmmetra sem þegar eru á svæðinu.
Áratugir síðan svipuð mannvirki hafa verið byggð
„Það eru liðnir áratugir síðan byggð hafa verið svipuð mannvirki á landi til bleikjueldis“, segir Jón Kjartan Jónsson framkvæmdastjóri Íslandsbleikju í samtali við Morgunblaðið. „Við vorum með þetta verkefni í startholunum í langan tíma og það er virkilega ánægjulegt að sjá þessi glæsilegu kör í dag sem munu fyllast af fiski eitt af öðru á næstu mánuðum. Þessi uppbygging er fyrsta stóra skrefið okkar í að auka framleiðslugetuna og byggja undir framtíðar vöxt bleikju-eldis á landi“, segir Jón Kjartan í samtali við blaðið.
Hundrað manns mættu
Morgunblaðið greinir frá því að í tilefni dagsins var slegið upp veislutjaldi og verktökum sem hafa komið að byggingunni og starfsfólki félagsins ásamt fjölskyldum þeirra boðið til grillveislu í eldisstöðinni. Þangað mættu um hundrað manns sem skoðuðu stöðina og gæddu sér á dýr-indis heilgrilluðu lambi með tilheyrandi meðlæti, dýrðlegri bleikju og hátíðartertu.
75 manns starfa hjá Íslandsbleikju
Eins og fyrr segir er Íslandsbleikja stærsti bleikjuframleiðandi í heimi og framleiðir tæp 3000 tonn af bleikju árlega. Með þessari nýju eldiseiningu er áætlað að auka heildarframleiðslu á bleikju um 25% á ári þegar öll kerin verða komin í fulla framleiðslu. Hjá félaginu starfa um sjötíu manns í fimm eldisstöðvum á Suðurlandi, Reykjanesi og Öxnafirði en í Grindavík er fer einnig fram slátrun og fullvinnsla fyrir afurðir félagsins.