Lax er vinsælasti eldisfiskur í heiminum. Eftirspurn eftir honum hefur verið vaxandi undanfarin ár og markaðshorfur eru mjög góðar áfram. Laxeldi er nú í
miklum vexti á Íslandi en laxeldi hefur verið stundað hér frá því fyrir 1980, þó með nokkrum hléum. Sú framleiðsluaukning sem orðin hefur undanfarin 6 ár hefur verið drifin áfram af uppbyggingu sjókvíaeldisins á sunnanverðum Vestfjörðum en framleiðsla er nú einnig hafin aftur í Berufirði og er í undirbúningi í Reyðarfirði, Ísafjarðadjúpi, Jökulfjörðum og Eyjafirði. Þá hefur lax verið alinn í landsstöðvum á norðurlandi og á Suðurnesjum með góðum árangri um árabil. Einungis er heimilt að ala laxfiska í sjóvkíum á Vestjörðum, Austfjörðum og í Eyjafirði og er sú ráðstöfun sett til verndar villtum laxastofnum, komi til óhappa eða slysasleppinga. Vegna þessa eru vaxtarmöguleikar laxeldisins á Íslandi nokkuð takmarkaðir en vonir standa til að hægt verði að framleiða á milli 50-70 þúsund tonn á þessum svæðum, nái öll áform að ganga eftir. Framleiðslan árið 2016 er áætluð um 8 þúsund tonn. Stærstu framleiðendurnir 2016 eru Arnarlax og Fiskeldi Austfjarða í sjókvíaeldinu og Íslandsbleikja í landeldinu.
Stærsta laxeldisfyrirtæki í heimi, Marine Harvest, gefur árlega út handbók sem kallast Salmon Farming Industry Handbook. Rit þetta inniheldur mikinn fróðleik um laxeldi á heimsvísu en komið er inn á framleiðslumál, markaðsmál, fóðurmál, kostnað og fjámál auk vísindaþátta. Skyldulesning fyrir hvern fiskeldismann og mjög fróðlegt fyrir áhugasama um þessa vaxandi atvinnugrein.
Staðreyndaskjal um laxeldi á Íslandi má nálgast hér.